newsnextone.com | ডিব্ৰুগড়ঃ কেৱল স্মৃতি হৈ ৰব সকলোবোৰ৷ জীৱনৰ আদি পাঠ আৰম্ভ কৰাসকলে খবৰটো শুনি হুকহুকাই কান্দিছে৷ সমনীয়াৰ সৈতে ধেমালি কৰি পাৰ কৰা সেই মুহূৰ্তবোৰক মনত পেলাই কেৱল চকুলোঁ টুকিছে৷ শৈশৱৰ মধুৰ সময় পাৰ কৰা আদৰৰ চাৰিবেৰৰ ঘৰ খন নাথাকিব৷ হেড চাৰৰ সেই কোঠালিটো নাথাকিব৷ মৰমৰ শ্ৰেণী কোঠা কেইটা নাথাকিব৷ মন্দিৰৰ দৰেই পবিত্ৰ বুলি জ্ঞান কৰা স্কুল খন দুদিন পিছত ইতিহাস হৈ যাব৷
তাহানি পঢ়ি যোৱা আৰু এতিয়াৰ ছাত্ৰসকলে কেৱল কব লাগিব তাত আমি পঢ়া স্কুল খন আছিল৷ থাকিব তাহানিৰ স্মৃতি কিন্তু বিচাৰি ফুৰিলেও নাপাব মৰমৰ স্কুলখন৷ স্কুল খন ব্ৰহ্মপুত্ৰ নদীৰ বুকুত জাহ যাবলৈ মাথো আৰু কেইটামান ঘণ্টা বাকী। এই পৰিস্থিতি এতিয়া মুখ্যমন্ত্ৰী সৰ্বানন্দ সোণোৱালৰ নিজ ঘৰৰ সমীপত। মুখ্যমন্ত্ৰী সৰ্বানন্দ সোণোৱালৰ নিজ ঘৰৰ সমীপ ব্ৰহ্মপুত্ৰ নদীত জাহ যাব বিদ্যালয়খন।
কেৱল এখন বিদ্যালয়ে নহয় বহু পৰিয়ালৰ ঘৰৰ ওচৰ চাপিছে ব্ৰহ্মপুত্ৰ নদী। যাৰ ফলত ৰাইজে হাহাকাৰ কৰিব লগা হৈছে। আপোন ঘৰ খন হেৰুওৱাৰ যন্ত্ৰণাত চটফটাব লগা হৈছে বহু পৰিয়ালে। কিয়নো কিছু দিন পিছতে তেওঁলোকৰ মৰমৰ ঘৰ খন নাথাকিব। ঘৰখনৰ সকলো জাহ যাব ব্ৰহ্মপুত্ৰ নৈৰ বুকুত।
মুখ্যমন্ত্রী সৰ্বানন্দ সোণোৱালৰ গৃহ জিলা ডিব্ৰুগড় জিলাৰ নিজ সমষ্টি চাবুৱাত এখন বিদ্যালয়কে ধৰি বহু পৰিয়াল ব্ৰহ্মপুত্ৰৰ বুকুত জাহ যাব ওলাইছে যদিও মুখ্যমন্ত্ৰীয়ে তিলমানো গুৰুত্ব প্ৰদান কৰা নাই বুলি অভিযোগ উত্থাপন কৰিছে ৰাইজে। ইমানে নহয় মুখ্যমন্ত্ৰীৰ নিজ গৃহৰ পৰা মাথো ৫০০ মিটাৰ নিলগত এতিয়া বিদ্যালয়খন জাহ যোৱাৰ লগতে বহু পৰিয়ালৰ ঘৰ-দুৱাৰ-মাটি-সম্পত্তি জাহ যোৱাৰ উপক্ৰম হৈছে।
মুখ্যমন্ত্ৰী, স্থানীয় বিধায়ক আৰু জিলা প্ৰশাসনৰ বিৰুদ্ধে ক্ষোভ প্ৰকাশ কৰাৰ বাহিৰে ৰাইজৰ ওচৰত নাই কোনো বিকল্প।ক্ষোভিত ৰাইজে মুখ্যমন্ত্ৰীক তীব্ৰ ভাষাৰে আক্ৰমণ কৰি গোটেই অসম পৰিৱৰ্তন কৰিব খোজা মানুহজনে নিজৰ ঘৰৰ ওচৰৰ এখন স্কুল আৰু কেইটামান পৰিয়ালৰ সা-সম্পত্তি ৰক্ষা কৰিব নোৱাৰিলে বুলি কয়। অসমৰ সৰ্বকালৰ অকৰ্মণ্য মুখ্যমন্ত্ৰী আখ্যা দি সোণোৱালক কেতিয়াও ক্ষমা নকৰোঁ বুলি কয় কেইবাগৰাকী লোকে। একাংশ বৃদ্ধই কয় যে সোণোৱাল আমাৰ সন্মুখত ডাঙৰ হৈছে। তেনে এজন মানুহে মুখ্যমন্ত্ৰী হৈ আমাক পাহৰি যাব বুলি ভাবিব নোৱাৰি। আমি এই বেদনা কেতিয়াও পাহৰি নাযাও। আমাৰ এই দুখ মৰাৰ পৰলৈ থাকিব।
মুখ্যমন্ত্ৰীৰ গৃহ সমষ্টি তথা নিজ পিতৃ গৃহৰ পৰা প্ৰায় ৫০০ মিটাৰ নিলগৰ পানীতোলা শিক্ষা খণ্ডৰ অন্তৰ্গত ৰংমলা তামোলবাৰী প্ৰাথমিক বিদ্যালয়খন মহাবাহু ব্ৰহ্মপুত্রৰ বুকুত জাহ যাবলৈ হয়তোঁ আৰু কেইটামান ঘণ্টা লাগিব। আনহাতে তাৰ পিছতে স্কুলৰ খনৰ সৈতে থকা জনগোষ্ঠীয় পৰিয়াল সমূহৰ ঘৰ-দুৱাৰ এটা এটাকৈ জাহ যাব। মুখ্যমন্ত্রী সৰ্বানন্দ সোণোৱালৰ গৃহ সমষ্টিৰ চাবুৱাৰ বালিজান গাঁও পঞ্চায়ত অন্তৰ্গত ৰংমলা গাঁও খনক অসমৰ দ্বিতীয় মাজুলী বুলি কোৱা হয়।
কিয়নো কেইটামান বছৰ পূৰ্বে ব্ৰহ্মপুত্ৰৰ সোঁত দুটা ভাগত বিভক্ত হৈ পৰাত গাঁও খনৰ এটা অংশ নদীৰ মাজত দ্বীপ আকাৰত ৰৈ যায়। যাৰ ফলত দ্বিতীয় মাজুলী বুলি কয় মানুহে। কিন্তু ক্ৰমান্বয়ে দ্বীপ সদৃশ গাঁও খন খহনীয়াৰ কৱলত পৰি নিশ্চিহ্ন হ'বলৈ মাজত মাথো কেইটামান ঘণ্টাহে লাগিব। ইমানৰ পিছতোঁ ভ্ৰুক্ষেপ নাই মুখ্যমন্ত্ৰী সৰ্বানন্দ সোণোৱাল, বিধায়ক বিনোদ হাজৰিকা আৰু জিলাৰ উপয়ুক্তৰ। ৰজাহৈ ডাঙৰ মানুহ হোৱা জন্ম গাঁৱৰ সমীপৰ গাঁও খনক তিলমানো ৰক্ষা কৰিবলৈ চেষ্টা নকৰিলে মুখ্যমন্ত্ৰীয়ে।
ইতিহাস হ'বলৈ ধৰিছে ১৯৭৪ চনত স্থাপিত প্ৰাথমিক বিদ্যালয়খন ৷ ৰাজ্যৰ মুখ্যমন্ত্রী সৰ্বানন্দ সোণোৱালৰ গৃহ সমষ্টিৰ চাবুৱা বালিজান গাঁও পঞ্চায়ত অন্তৰ্গত ৰংমলা গাঁৱৰ একমাত্র প্ৰাথমিক বিদ্যালয় ৰংমলা প্ৰাথমিক বিদ্যালয়খন নাথাকিব সঁচা কিন্তু অধ্যয়নৰত ছাত্ৰ-ছাত্ৰীসকল কলৈ যাব। পঢ়িবলৈ এখন টিনৰ ছালি লাগিব। এডোখৰ ওখ ভূমি লাগিব। বাৰিষা পাব জানো এটুকুৰা ভূমি। এতিয়া এক অনিশ্চিত ভৱিষ্যতৰ দিশে আগবাঢ়িছে বিদ্যালখনৰ ৬০ গৰাকী ছাত্ৰ-ছাত্ৰীয়ে ৷
ছাত্ৰ-ছাত্ৰীসকলক আন এখন স্কুলত পঢ়িবলৈ সুবিধা দিয়া হ'ব যদিও প্ৰতিদিনে ব্ৰহ্মপুত্ৰ বুকুৰে নাৱত পাৰ হৈ যাব লাগিব। এতিয়া ডাঙৰ প্ৰশ্ন হ'ল কণ কণ ছাত্র-ছাত্রীসকলৰ ভৱিষ্যত আৰু সুৰক্ষা। এই কথা চিন্তি দিক বিদিক হেৰুৱাই পেলাইছে ৰাইজে। কিয়নো অান এখন বিদ্যালয়লৈ যাবলৈ নিতো সৰু নাৱেৰে অহা যোৱা কৰিব লাগিব ৷ এনেবোৰা চিন্তাৰ মাজত দিন পাৰি কৰিছে ৰংমলা গাঁৱৰ ৯৫টা পৰিয়ালে।
তীব্ৰ গৰাখহনীয়াৰ কৱলত পৰি চিন্তিত গাঁওবাসী ৷ দৈনিক ঘৰ-বাৰী মহাবাহু ব্ৰহ্মপুত্রৰ খহনীয়া জাহ যোৱাত এঠাই পৰা অানঠাইলৈ যাবলৈ চিন্তিত হৈ পৰিছে। কিয়নো দৰিদ্ৰ পৰিয়াল সমূহে মাটি পাব ক'ত অাৰু পূনৰ ঘৰ নিৰ্মাণ কেনেকৈ কৰিব এতিয়া ডাঙৰ প্ৰশ্ন হৈ পৰিছে ৷ ইতিমধ্যে গৃহ নিৰ্মাণ কৰিব নোৱাৰি অানৰ ঘৰত অাশ্ৰয় লব লগা হৈছে বহু পৰিয়াল ৷ জানিব পৰা মতে, মুখ্যমন্ত্ৰীৰ নিজ গাঁৱৰ পৰা মাথো কিছু নিলগত প্ৰায় ১০০০ পৰিয়াললৈ খহনীয়াই ভাবুকি কঢ়িয়াই অানিছে। যদি চৰকাৰে কোনো ব্যৱস্থা গ্ৰহণ নকৰে তেন্তে এক অভাৱনীয় পৰিস্থিতিৰ সৃষ্টি হ'ব শীঘ্ৰে। যিটো পৰিস্থিতিৰ কথা ভাবিব নোৱাৰে।
শেহতীয়াকৈ ৰাজ্যখনৰ পাহাৰ ভৈয়াম, নৈৰ দাঁতিৰ গাঁও সমূহত বসবাস কৰা একাংশ থলুৱা-জনগোষ্ঠীয় লোকে পেটৰ ভাতমুঠিৰ বাবে হাহাকাৰ কৰিব লগা হৈছে৷ গৰাখহনীয়াৰ পৰা আৰম্ভ কৰি দৰিদ্ৰতা, ৰোগ-ব্যাধী আদিয়ে সৰ্বশ্ৰান্ত কৰা ৰাজ্যখনৰ শ-শ পৰিয়ালে মাটি-ভেটি হেৰুৱাই হাহাকাৰ কৰিব লগা হৈছে৷ নৈৰ দাতিৰ বহু গাঁও ব্ৰহ্মপুত্ৰ আৰু আৰু ইয়াৰ উপ নৈ সমূহৰ কোবাল সোঁতে খহনীয়াৰ সৃষ্টি কৰি সা-সম্পত্তি, ঘৰ-দুৱাৰ সকলো হেৰুৱাব লগা হৈছে৷
বিশেষকৈ মুখ্যমন্ত্ৰী সৰ্বানন্দ সোণোৱালৰ গৃহ জিলাত থলুৱা লোকে হাহাকাৰ কৰিব লগা হৈছে৷ ডিব্ৰুগড় জিলাৰ বালিজান, দধীয়া, একেখন জিলাৰ লাহোৱাৰ সমষ্টিৰ ৰহমৰীয়াত গৰাখহনীয়াই কাল ৰূপ ধাৰণ কৰাৰ পিছতোঁ চৰকাৰ খনে খহনীয়া ৰোধৰ বাবে যেনেদৰে ততপৰ হৈ উঠিব লাগিছিল তাৰ পৰিৱৰ্তে নীৰৱ ভূমিকাই শংকান্বিত কৰি তুলিছে শ শ পৰিয়ালক৷ পুনৰ বাৰিষাই আশাৰ ক্ষীণ পোহৰ দেখা নাই কোনো এটা পৰিয়ালেও।
বিনিয়োগকাৰীক আদৰাৰ বাবে কোটি কোটি টকা খৰচ কৰা ৰাজ্য চৰকাৰে মুখ্যমন্ত্ৰীৰ গৃহ জিলাৰ লোকে এতিয়া ফেচবুকত পোষ্ট দি প্ৰতিবাদ কৰিব লগা হৈছে৷ জিলা খনৰ বহু ঠাইত ব্ৰহ্মপুত্ৰই কালৰূপ ধাৰণ কৰিছে যদিও গুৰুত্ব প্ৰদান কৰা নাই চৰকাৰে। প্ৰাকৃতিক সম্পদেৰে চহকী জিলা খনৰ আজিলৈ গৰাখহনীয়া ৰোধ কৰিবলৈ চৰকাৰে পদক্ষেপ লোৱা দেশা নাযায়৷ সাৰুৱা তেলৰ বাবে জিলা খনৰ বুকু প্ৰতিদিনে খনন কৰে যদিও থলুৱাৰ সমস্যাক গুৰুত্ব প্ৰদান নকৰে চৰকাৰ তথা অইলে৷
ব্ৰহ্মপুত্ৰ নদীয়ে শ-শ পৰিয়ালক কন্দুৱাইছে যদিও খবৰ লবলৈ আহৰি নাই চৰকাৰ মহাৰাজৰ৷ নদীৰ তাণ্ডৱৰ বাবে তুপুনি হৰিছে শ-শ লোকৰ৷ নিজে হাতৰে মানুহে চকুলো টুকি নিজৰ আপোন ঘৰ খন ভাঙিছে৷ যাৰ বুকুত জ্বলা জুইকুৰা কোনেও দেখা নাপাও৷ নৈৰ বুকুত জাহ যাব খোজা নিজৰ ঘৰখন নিজ হাতেৰে ভাঙি পেলাব লগা হোৱাৰ মৰ্মবেদনা মন্ত্ৰী-বিধায়কে বুজি নাপাব৷ শীততাপ নিয়ন্ত্ৰিত গাড়ীত জীৱন কটোৱা মানুহে গৃহহীনৰ মৰ্মবেদনা বুজিবলৈ প্ৰয়োজনেই বা আছে কি৷
কেইটমান টকা আৰু ধৰ্মৰ নামত ৰাজনীতি কৰা এতিয়াৰ নেতাই গৰীৱ-দৰিদ্ৰ, খাটিখোৱাৰ অন্তৰৰ কথা শুনিবলৈ আহৰি বা আছে ক’ত৷ আজি যদি সময় থাকিল হেতেন তেন্তে সেইসকল দিকবিদিক হেৰুৱাই নিজৰ আপোন ঘৰখনত হাতুৰেৰে কোব দিয়া লোকসকলৰ ওচৰলৈ আহিলে হেতেন৷ নতুবা পূৰ্বে আহি ৰাজকোষৰ টকা উচিত কামত ব্যৱহাৰ কৰি তেওঁৰ ঘৰখন ৰক্ষা কৰিলেহেত৷ কিন্তু ৰজাহতৰ সময় ক’ত৷